2025 жылғы 5–15 қараша аралығында академик Е.А. Бөкетов атындағы Қарағанды ұлттық зерттеу университетінде Түркияның Кастамону университетінің доценті Омер Фарук Атеш Түркі университеттері одағына мүше жоғары оқу орындары арасындағы «Орхун» академиялық алмасу бағдарламасы аясында іссапармен келді.
«Орхун» бағдарламасы 2017 жылы Түркі мемлекеттері ұйымы жанындағы Түркі университеттері одағының негізгі бағыттарының бірі ретінде бастау алды. Бағдарламаның мақсаты – түркі әлеміндегі университеттер арасында академиялық ынтымақтастықты дамыту, мәдени, білім беру және ғылыми байланыстарды нығайту, бірыңғай білім кеңістігін құру, сондай-ақ студенттер мен оқытушылар алмасуын жүзеге асыру.
2021 жылдан бастап «Орхун» бағдарламасының тұрақты үйлестірушісі – Қырғыз-Түрік «Манас» университеті (Бішкек қ., Қырғызстан). Бүгінде бағдарламаға Әзербайжан, Қазақстан, Қырғызстан, Венгрия, Өзбекстан және Түркия елдерінен 102 университет қатысады.
«Орхун» бағдарламасы аясында оқытушылар мен студенттер серіктес университеттерде оқып, жұмыс істеу, тәжірибе алмасу, түркі әлемі елдерінің мәдениеті мен білім жүйесін танып-білу, сондай-ақ бірлескен ғылыми және білім беру жобаларына қатысу мүмкіндігіне ие болады.
Омер Фарук Атештің сапары қазіргі түркі әдебиеті саласындағы оқытушылар арасындағы ғылыми ынтымақтастық пен тәжірибе алмасуды дамытуға, сондай-ақ Кастамону университеті мен академик Е.А. Бөкетов атындағы Қарағанды ұлттық зерттеу университеті арасындағы әріптестік байланыстарды нығайтуға бағытталған.
Омер Фарук Атеш – түрік тілі мен әдебиеті саласындағы философия докторы, қазіргі түрік және әзербайжан әдебиеттері бойынша маман, Түркияда, Қазақстанда және басқа елдерде жарық көрген бірқатар ғылыми еңбектер мен монографиялардың авторы.
Сапар бағдарламасы қазіргі әдебиеттану мен түркі халықтарының мәдени өзара байланысы мәселелеріне арналған дәрістер, ғылыми семинарлар және филология факультетінің оқытушылары мен студенттерімен кездесулер өткізуді қамтиды. Бұл сапар университеттер арасындағы академиялық ынтымақтастық пен мәдени алмасуды нығайту жолындағы маңызды қадам болмақ.
