кафедра меңгерушісі
филология ғылымдарының кандидаты
қауымдастырылған профессор
Телефон: +7 7212 77 17 07
E-mail: Kazadebiet@buketov.edu.kz
Мұқанов көшесі, 1, № 8 ғимарат
Instagram
Қазақ әдебиеті кафедрасы білім беру саласындағы мамандарды даярлайды, бакалавриат пен магистратураға, докторантураға білім беру бағдарламаларын ұсынады.
Студенттер «Қазіргі қазақ әдебиеті: жанр және стиль мәселелері», «Ұлттық әдебиеттану ғылымының тарихы мен әдіснамасы», «Көркем шығарма мәтіні және филологиялық талдау» атты үш бағыт бойынша білім алуға мүмкіндік алады. Оқу бағдарламасына «Әдебиеттануға кіріспе», «Әдебиет теориясы», «Қазіргі қазақ әдебиеті», «Шетел әдебиеті», «Қазақ халқының рухани мұрасы», «Абайтану» және т.б. сияқты өзекті пәндер кіреді.
Кафедра түлектері қазақ тілі мен әдебиеті пәнінің мұғалімі, ғылыми-зерттеу мекемелерінде кіші ғылыми қызметкер, әдеби кеңесші және іс-қағаздарын жүргізуші, аудармашы болып жұмыс істей алады.
Қазақ әдебиеті кафедрасы әлемдік әдебиеттану жетістіктеріне сүйене отырып, әдебиет тарихы мен теориясын зерттеу және оқытудың жаңа жүйесін жасауда. Тарихи деректерді, мәдени және әдеби-көркем даму заңдылықтарын, ұлттық менталитеттің ерекшеліктерін анықтайтын ішкі және сыртқы факторларды зерттеу басым бағыт ретінде ұсынылады.
Даталар мен фактілер
Тарихы:
Қазақ әдебиеті кафедрасы 1966 жылы дербес кафедра болып жұмыс істей бастады. Сол кездері кафедра құрамында З.Т.Жұмағали, А. Нәрешов, М.Қ.Смағұлов, Ә.Әзиев, Қ.К.Лекеров т.б. болды. Құрылған күнінен бастап 1994 жылға дейін кафедраны профессор З.Т.Жұмағали басқарды.
«Балауса» шығармашылық бірлестігінің ғылыми-шығармашылық бағыттағы жұмысын жандандыру мақсатында кафедра ұжымы жазушы Ж.Бектұровпен және тағы басқа да белгілі мәдениет қайраткерлерімен тығыз байланыста болды. Түрлі кезеңдерде шығармашылық бірлестікті доценттер М.Қ.Смағұлов пен З.Т.Жұмағали, сондай-ақ, Б.С.Рахимов пен Ж.Қ. Смағұлов басқарды, олар шығармашыл жастардың дамуы мен тәрбиесіне өз үлестерін қосты.
Кафедраның профессорлық-оқытушылар құрамы Б.Кәрібаева, Ж.Смағұлов, Б.Рахимов, Т.Есенбеков, Б.Мамыраев, М.Хамзин, Н.Жұмаділова сияқты жоғары білікті мамандармен толықты. Кафедра оқытушылары С.Мұқанов, С.Қирабаев, Т.Кәкішұлы, Н.Ғабдуллин, М. Әлімбаев, Қ.Исабаев, Н.Оңдасынов, О.Бөкей, М.Шаханов, С.Жүнісов, Қ.Жұмаділов, Р.Нұрғали, Е.Тілешов, Б.Әбдіғазыұлы, О.Әбдіманұлы, Ғ.Жайлыбай, С.Ақсұңқарұлы және т.б. ғалым-жазушылармен кездесулер ұйымдастырды.
Кафедраны З.Т.Жұмағали, Қ.К.Лекеров, Қ.П.Есбаев, Б.К.Кәрібаева, Ж.К.Смағұлов, Б.С.Рахимов, М.Х.Хамзин, С.Б.Жұмағұлов, К.А.Төлеубаева, Ж.Ж.Жарылғапов сияқты жоғары білікті ғалымдар басқарды. Бүгінгі таңда кафедраға филология ғылымдарының кандидаты, доцент С.У.Такиров басшылық жасайды.
Оқытушылар:
Қазіргі уақытта кафедрада филология ғылымдарының докторлары, профессорлар – 4, филология ғылымдарының кандидаттары, доценттер – 4, педагогика ғылымдарының 3 магистрі жұмыс істейді. Осы уақытқа дейін кафедраның 6 оқытушысы Республикалық «Жоғары оқу орнының үздік оқытушысы» атағының иегері болды.
Кафедра оқытушылары Еуропа мен Азияның ғылыми орталықтарында халықаралық тағылымдамадан өтті. Атап айтқанда, профессорлар Ж.Қ.Смағұлов, Ж.Ж.Жарылғапов, С.У.Такиров, А.Б.Жұмағұлов ҚХР, Түркия және Чехияның жетекші университеттерінде халықаралық тағылымдамадан өтсе, профессорлар Ж.Қ.Смағұлов пен Ж.Жарылғапов Халықаралық академиялық ұтқырлықты дамыту мақсатында Пекин қаласындағы Миндзу университетінде (ҚХР) дәріс оқыды, Б.С.Рахимов Жапонияның Цукуба университетінде тағылымдамадан өтті.
Білім алушылар:
Кафедра студенттерінің контингенті жыл сайын артып келеді, үш жыл ішінде ол бір жарым есе өсті. Кафедра студенттерінің құрамында Өзбекстан, Моңғолия, Қытай азаматтары, Қазақстанның түрлі өңірлерінен келген студенттер білім алады. Кафедра студенттері академиялық ұтқырлық бағдарламасына қатысып, Қазақстанның ұлттық университеттері мен Қытай университеттерінде білім алып келген.
Жұмысқа орналастыру:
Кафедра түлектері университетті бітіргеннен кейін жұмысқа орналасады, көптеген түлектер мансапта жетістікке жеткен, соның ішінде магистратура, докторантураға түсіп, «Bolashaq» бағдарламасы бойынша білім алып жатқан түлектер де бар.
Аккредиттеу және көшбасшылық:
Кафедра бағдарламалары ұлттық аккредиттеуден өтіп, ұлттық рейтингте көш бастап тұр.
Серіктестер:
Кафедра Әл-Фараби атындағы ҚазҰУ, Л.Н. Гумилев атындағы Еуразия ұлттық университеті, Абай атындағы Қазақ ұлттық педагогикалық университеті, Шәкәрім атындағы Семей мемлекеттік университеті, А.Байқоңыров атындағы Жезқазған университеті, Еуразиялық гуманитарлық институт сияқты Қазақстанның жетекші жоғары оқу орындарымен белсенді жұмыс істеп келеді. Шетелдік серіктестердің қатарында Ресей, Қытай, Түркиядағы танымал университеттер бар. Бүгінгі күні Диджле университетімен, Гази университетімен (Түркия), Іле педагогикалық университетімен (Қытай) докторанттарды бірлесіп оқыту туралы меморандум бар.
Жобалар:
Кафедра профессоры Ж.Қ.Смағұлов Пекин қаласындағы Минзу университетімен «Әдебиеттану әдіснамасы» атты халықаралық ғылыми жобаны жүзеге асырды.
Сонымен қатар, кафедра бюджеті 10 млн. теңгені құрайтын «Қасымтану мәселелері» атты ғылыми жобаны жүзеге асыруда (жетекшісі - профессор Ж.Жарылғапов).
Білім беру бағдарламалары
6В01701 «Қазақ тілі мен әдебиеті»: бакалавриат. Бағдарлама қазақ тілі мен әдебиеті мұғалімі ретінде кәсіби қызметті жүзеге асыруға қабілетті маман даярлауға бағытталған. Түлектер педагогикалық білімдер бакалавры дәрежесін алып, мектепте мұғалім, ғылыми-зерттеу мекемелерінде кіші ғылыми қызметкер, әдеби кеңесші, аудармашы болып жұмыс істей алады.
7М01701701 «Қазақ тілі мен әдебиеті»: магистратура. Бағдарлама жоғары білім беру жүйесінде, ғылыми зерттеулер саласында сұранысқа ие ғылыми-педагогикалық кадрларды дайындаумен байланысты. Магистранттар кейбір пәндерді ағылшын тілінде оқуға мүмкіндігі бар. Түлектер педагогика ғылымдарының магистрі дәрежесін алады және жоғары, орта және орта арнаулы оқу орындарында, мәдени мекемелерде оқытушы және баспаларда редактор-корректор бола алады, сонымен қатар, ұйымдардағы іс қағаздарымен айналысады.
8D01701 «Қазақ тілі мен әдебиеті»: докторантура. Бағдарлама филология саласында ғылыми жұмыстар жүргізуге қабілетті философия докторын (PhD) дайындаумен байланысты. Докторанттарға кейбір пәндерді ағылшын тілінде оқуға, шетелдік профессорлардан кеңес алуға мүмкіндік бар. Түлектер университеттерде сабақ бере алады, ғылыми орталықтарда жұмыс істей алады.
