кафедра меңгерушісі
аға оқытушы
Телефон: +7 (7212) 356430
E-mail: tanin.alibek@gmail.com
Университет көшесі, 28а, 2 ғимарат
Facebook
«Математикалық анализ және дифференциалдық теңдеулер» кафедрасы математика саласында мамандар дайындайды, бакалавриат, магистратура және докторантура деңгейлері бойынша білім беру бағдарламаларын ұсынады.
Кафедраның студенттері келесі үш траектория бойынша білім алу мүмкіндігіне ие: жаратылыстану-ғылыми, ғылыми-педагогикалық және педагогикалық. Оқыту бағдарламасына «Вариациялық есептеу және оптимизация тәсілдері», «Анализдің таңдаулы сұрақтары», «Жаратылыстану-ғылыми ортада перспективалық ғылыми зерттеулерді жобалау» сияқты өзекті пәндер кіреді. Студенттер іргелі математика саласында арнайы біліммен қамтамасыз етіліп шығады.
Кафедра түлектері ҒЗИ қызметкерлері, мектептер мен колледждерде математика, физика пәндерінен мұғалім, басқарудың автоматтандырылған жүйесін пайдаланатын салаларда математик-бағдарламашы болып қызмет атқара алады.
Кафедраның ғылыми қызығушылығы бөлшек ретті жүгі бар жылуөткізгіштік теңдеулері үшін шеттік есептерді зерттеумен, математикалық физиканың классикалық емес есептері және псевдо-Вольтерр интегралдық теңдеулерімен, арнайы шекаралық шарттары бар туынды аймақтардағы жылуөткізгіштіктің шеттік есептерімен, функцияларды жуықтау теориясымен байланысты дамып жатыр.
Даталар және фактілер
Тарихы:
«Математикалық талдау және дифференциалдық теңдеулер» кафедрасы 28.08.2006 ж. «Математикалық талдау» және «Дифференциалдық және интегралдық теңдеулер» атты екі іргелі кафедраның қосылуының нәтижесінде пайда болған.
Университет құрылғанға дейін «Математикалық талдау» кафедрасы Қарағанды педагогикалық институтының физика-математика факультетінің құрамында болды. Ол кезде кафедраны ф.-м.ғ.к. В.А. Нам басқарған болатын. 1972 жылы университет ашылған кезде кафедра меңгерушілігіне Қазақ политехникалық институтынан ф.-м.ғ.к., доцент М.А. Перевертун шақырылып, ол осы лауазымда 1978 жылға дейін қызмет атқарды. Әртүрлі жылдарда аталмыш кафедраның меңгерушісі қызметін ф.-м.ғ.д., профессор Е.С. Смаилов, ф.-м.ғ.к., доцент Ғ.А. Ақышев, ф.-м.ғ.к., доцент Ж.Х.Жантілесов, ф.-м.ғ.д., профессор Л.Қ. Құсайынова атқарды.
1983 жылы профессор Е.С. Смаиловтың басшылығымен кафедрада 01.01.01-Математикалық талдау мамандығы бойынша аспирантура, 1999 жылы – магистратура, ал 2001 жылы докторантура ашылды. 1996-2000 жылдар аралығында Е.С. Смаилов, Н.А. Боқаев, Е.Д. Нұрсұлтанов, Л.Қ.Кұсайыновалар докторлық диссертацияларын қорғады. Әртүрлі жылдарда Е.С. Смаилов, Н.А. Боқаев, Е.Д. Нұрсұлтанов, Л.Қ.Кұсайынова тәрізді профессорлар мен доцент Ғ.А.Ақышевтың жетекшілігімен кафедраның жиырмадан астам түлегі кандидаттық диссертацияларын қорғады.
Қарағанды математика мектебінің лайықты мойындалуы ретінде 2000 жылы академик Е.А. Бөкетов атындағы Қарағанды мемлекеттік университетінде «01.01.01-Математикалық талдау» мамандығынан кандидаттық диссертация қорғау жөніндегі К.14.50.03 кеңесінің ашылуын айтуымыз керек.
«Дифференциалдық және интегралдық теңдеулер» кафедрасы 1972 жылы академик Е.А. Бөкетов атындағы Қарағанды мемлекеттік университеті құрылғаннан кейін бірден ашылған болатын. Ашылған кезінде кафедрада 3 доцент (сол кездегі факультеттегі дәрежесі бар оқытушылардың жартысы), 2 аға оқытушы және 2 ассистент оқытушы қызмет атқарды. Кафедраның ПОҚ дифференциалдық теңдеулер, интегралдық теңдеулер, математикалық физика теңдеулері, математикалық модельдеу тәсілдері, математикалық физика тәсілдерінен дәрістер курстарын және арнайы курстарды оқыды.
Кафедраның алғашқы меңгерушісі – доцент Игликов Абдрахман Игликович. Кафедраны әртүрлі жылдары ф.-м.ғ.к., доцент Т.С. Сматов, ф.-м.ғ.к., доцент Ю.И. Елефтериади, ф.-м.ғ.к., доцент Т.Е. Омаров, ф.-м.ғ.к., доцент С.А. Абдыманапов, ф.-м.ғ.к., доцент М.И. Рамазанов, ф.-м.ғ.д., профессор Л.К. Кусаинова, ф.-м.ғ.к., доцент Б.С. Кошкарова, ф.-м.ғ.к., доцент Б.Х.Жанбусинова басқарған болатын.
1992 жылы кафедрада 01.01.02 – Дифференциалдық теңдеулер және математикалық физика мамандығы бойынша аспирантура, 1995 жылы магистратура ашылды. Кафедраның жұмыс істеу кезеңінде 8 кандидаттық, 2 докторлық диссертация қорғалды.
2005 жылдан қазіргі уақытқа дейін 5 кандидаттық диссертация (Б.С.Кошкарова, Б.К. Шаяхметова, Н.Т. Орумбаева, Г.А. Есенбаева, Г.Ш.Искакова), 2 докторлық диссертация (М.И. Рамазанов, 2006 ж., Ғ.А.Ақышев, 2010 ж.) және математика бойынша PhD дәрежесін алу үшін 1 диссертация (М.Т. Космакова) қорғалды.
2015 жылдан бері «6D060100-Математика» мамандығы бойынша PhD докторантурасы жұмыс істеуде.
2017 жылы «6D060100-Математика» мамандығы бойынша Ph докторлықты қорғайтын Диссертациялық кеңес 3 жыл мерзімге ашылды.
2018 жылы 5В012600-Математика-Физика мамандығы ашылды.
Оқытушылар:
Кафедрада 10 оқытушы жұмыс істейді, оның 7-еуінде ғылыми дәреже және атақ бар, жоғары оқу орнының үздік оқытушыларының саны – 3: ф.-м.ғ.д., профессор М.И. Рамазанов – 2009, 2020; ф.-м.ғ.к. Н.Т. Орумбаева – 2018; математика бойынша PhD М.Т. Космакова – 2019.
Білім алушылар:
Кафедра бағдарламалары бойынша Моңғолия, Қытайдан келген шетелдік студенттер оқиды, сонымен қатар Қазақстанның басқа аймақтарынан студенттер келіп білім алады.
Соңғы 5 жылда 5В060100/6В05401-Математика мамандығы бойынша білім алушылар контиегентінің өсу көрсеткіші:
2016-2017 оқу жылы – 40 студент,
2017-2018 оқу жылы – 45 студент,
2018-2019 оқу жылы – 47 студент,
2019-2020 оқу жылы – 47 студент,
2020-2021 оқу жылы – 53 студент.
Соңғы 3 жылда 5В012600/6В01502.1-Математика-Физика мамандығы бойынша білім алушылар контиегентінің өсу көрсеткіші:
2018-2019 оқу жылы – 32 студент,
2019-2020 оқу жылы – 67 студент,
2020-2021 оқу жылы – 87 студент.
Жұмысқа орналасуы:
5В060100-Математика мамандығы бойынша түлектердің жұмысқа орналасуы – 100%.
Диссертациялық кеңес:
6D060100-Математика бағдарламасы бойынша философия докторы (PhD) дәрежесін қорғау жөніндегі Диссертациялық кеңес. Үш жылда осы Кеңесте 11 докторант диссертациясын қорғады, оның 4-еуі академик Е.А.Бөкетов атындағы ҚарУ-нен, 5-еуі Л.Н. Гумилев атындағы ЕҰУ-нен, 2-еуі М. Әуезов атындағы ОҚМУ-нен.
Аккредиттеу және көшбасшылық:
Кафедраның барлық бағдарламасы БСҚБТ Агентігінің ұлттық аккредитациясына ие және ұлттық рейтингте лайықты орындарда:
5В060100/6В05401-Математика білім беру бағдарламасы 2019-2020 оқу жылы нәтижесі бойынша ҚР ҰКП «Атамекен» рейтингінде 1-орынды, АРТА (IAAR) рейтингісінде 3-орынды иеленді.
7М01501001-Математика білім беру бағдарламасы 2019-2020 оқу жылында БСҚБТА (IQAA) рейтингісінде 2-орынды иеленді.
7М054092001-Математика білім беру бағдарламасы 2018-2019 оқу жылында БСҚБТА (IQAA) рейтингісінде 3-орынды иеленді.
6D060100/8D054092001-Математика білім беру бағдарламасы 2018-2019 оқу жылында БСҚБТА (IQAA) рейтингісінде 1-орынды иеленді.
Жобалар:
ҚР БҒМ қаржыландыратын:
- Бөлшек ретті жүктемесі бар жылуөткізгіштік теңдеуі үшін шеттік есептер.
- Псевдо-Вольтерр интегралдық теңдеулері және классикалық емес эволюциялық шекаралық есептер, 2018-2020 жылдарға.
- Арнайы шекаралық шарттары бар туынды аймақтардағы жылуөткізгіштіктің шеттік есептері.
Білім беру бағдарламалары
6B05401 «Математика»: бакалавриат. Білім беру үдерісі барысында студент күнделікті мәселелерді шешудің математикалық есебін жасауды, әртүрлі формада (кестелер, диаграммалар, графиктер) берілген ақпараттар негізінде қорытынды жасауды, шеттік және экстремалдық есептердің математикалық моделін құруды, функцияларды және қатарлардың жинақтылығын зерттеу кезінде, шеттік және экстремалдық есептерді шешу кезінде дифференциалдық және интегралдық есептеулер тәсілдерін қолдануды үйренеді. Студенттердің кейбір пәндерді ағылшын тілінде оқып үйренуіне мүмкіндіктері бар. Түлектер жаратылыстану бакалавры дәрежесін алады және мектептер мен колледждерде математика мұғалімі, математик-бағдарламашы болып жұмыс жасай алады.
6B01502.1 «Математика-Физика»: бакалавриат. Білім беру үдерісі барысында студент алған теориялық білімін қазіргі заман ғылымы мен білім беруді дамытудағы өзекті мәселелерімен еркін байланыстыруды, физикалық процестерді математикалық инструментарийдің көмегімен өз бетінше сипаттауды, жоғарғы математиканың негізгі теоремалары мен тұжырымдарын қолжетімді формада түсіндіруді, математикалық есептерді шешудің ең тиімді жолдарын таңдауды, физикалық құбылыстарды толық талдау үшін алған білімдерінің құрылымдалған тізбегін құруды үйренеді. Студенттердің кейбір пәндерді ағылшын тілінде оқып үйренуіне мүмкіндіктері бар. Түлектер білім бакалавры дәрежесін алады және мектептер мен колледждерде, репетиторлық орталықтарда сабақ бере алады.
7М01501001 «Математика»: магистратура. Білім беру үдерісі арқылы магистрант педагогикалық және ғылыми жаңалықтарды оқу процесіне енгізуді, ғылыми зерттеуді кәсіби деңгейде жүргізуді, кәсіби қызметте шығармашылық тәсілді пайдалануды, оқу материалын білім беруде жоғары нәтижеге қол жеткізу үшін пайдалануды және т.б. үйренеді. Түлектер педагогика ғылымдарының магистрі академиялық дәрежесін алады және жоғары оқу орындарында, ғылыми зерттеу институттарында, мемлекеттік әкімшілік басқару жүйесі органдарында жұмыс істей алады.
7М05409201 «Математика»: магистратура. Білім беру үдерісі арқылы магистрант жуықтау теориясымен байланысты зерттеулерді талдауды, функцияның дифференциалдық қасиеттерін анықтауды, функционалдық кеңістіктердің арабайланысын анықтауды, әртүрлі облыстардағы жылуөткізгіштік теңдеулер үшін шеттік есептерді шешуді, Вольтеррдің екінші ретті сингулярлық интегралдық теңдеуін шешуді, оқу процесінде оқытылатын пәндердің теориялық негізін түсініп, оны ғылыми-зерттеу қызметінде пайдалануды және т.с.с. үйренеді. Түлектер жаратылыстану ғылымдарының магистрі академиялық дәрежесін алады және жоғары оқу орындарында, ғылыми зерттеу институттарында, жобалық, технологиялық және конструкторлық ұйымдарда, мемлекеттік әкімшілік басқару жүйесі органдарында жұмыс істей алады.
8D05401 «Математика»: докторантура. Білім беру үдерісі барысында докторант интегралдық түрлендірулер және олардың қолданылу саласында, моделдер теориясында, шеттік есептер теориясында, функциялар теориясында зерттеудің заманауи тәсілдерін және ақпараттық-коммуникациялық технологияларды пайдаланып, өз бетінше ғылыми-зерттеу жұмыстарын жүргізуді үйренеді. Диссертациясын қорғаған түлектер философия докторы (PhD) академиялық дәрежесін алады және жоғары оқу орындарында, ғылыми зерттеу институттарында, жобалық, технологиялық және конструкторлық ұйымдарда, мемлекеттік әкімшілік басқару жүйесі органдарында т.с.с. жұмыс істей алады.
