2023 жылдан бастап Қарағанды академик Е.А. Бөкетов атындағы университетінде «Күміс университет» инновациялық білім беру бастамасы жүзеге асырылуда. Күміс университетінің миссиясы – 55 жастан асқан ересек адамдарға жеке даму, әлеуметтік интеграция және денсаулықты жақсарту үшін қолжетімді және пайдалы білім беру мүмкіндіктерін жасау. Қосымша білім беру факультеті 2024 жылғы 18 желтоқсанда №52767 авторлық құқық туралы куәлік алды. Куәлік 2024 жылы сәтті сынақтан өткен ересектерге арналған бейресми білім беру бағдарламалары жинағына берілді. Жинақтың құрастырушылары – ҚББ факультетінің деканы Мұқанова С.Д., әдіскерлер Шахметова А.Б. және Хамитова А.А. Жинаққа 2024 жылы 90 адам оқыған 10 бағдарлама енгізілген. Бағдарламаларды заң, математика, экономика, филология, шет тілдері факультеттерінің оқытушылары әзірлеген. «Сауықтыру: физикалық бейімделу, спорттық жаттығулар, салауатты өмір салты» бағдарламасын ҚарУ-дың серіктес ұйымы – "Персона" фитнес орталығы әзірледі.
