3 қазанда Қарағанды Бөкетов зерттеу университетінде есеп беру отырысы өтті, онда Басқарма төрағасы-ректор Н. О. Дулатбеков университеттің 2023—2024 оқу жылындағы жұмысын қорытындылады. Отырыс барысында маңызды іс-шаралардың нәтижелері ұсынылып, болашақ жоспарлар белгіленді. Жылдың жарқын және шығармашылық оқиғаларының бірі күзгі фотосуреттер мен бейнелерге арналған «Autumn vibe BUKETOV» онлайн байқауы болды. Бұл шығармашылық шара студенттерге өздерінің таланттары мен қабілеттерін көрсетуге мүмкіндік берді. Дауыс беру қорытындысы бойынша бірінші орынды педагогика факультеті, екінші орынды биология-география факультеті, үшінші орынды жастар саясаты департаменті иеленді. Ректор өз сөзінде студенттер мен оқытушылар үшін жаңа көкжиектер ашып, тәжірибе алмасуға және оқу үдерісіне инновациялық тәсілдерді енгізуге мүмкіндік беретін басқа елдердің жетекші университеттерімен әріптестік қатынастардың белсенді дамып келе жатқанына тоқталды. Қарағанды университеті 2024 жылы жоғары оқу орындарына сұраныстың ұлттық рейтингінде үшінші орынды иеленді. Бұл студенттердің жоғары дайындық деңгейін және олардың еңбек нарығындағы бәсекеге қабілеттілігін көрсетеді. Университеттің 2020-2025 жылдарға арналған стратегиялық даму жоспарының маңызды көрсеткіші академиялық ұтқырлық аясында университетті қаржыландыру есебінен оқитын студенттер үлесін арттыру болып табылады. 2023-2024 оқу жылында 35 студентке Польша, Ресей, Беларусь және Түркия университеттерінде оқуға қаржылық қолдау көрсетілді. Сонымен қатар, университет инженерлік білім берудің еуропалық сапа белгісі бойынша аккредиттеуден сәтті өтті, бұл мамандарды даярлаудың жоғары деңгейін растайды. Қазақстан Республикасы Үкіметінің 2024 жылғы 5 сәуірдегі қаулысы бойынша университетке ғылыми зерттеулер мен инновациялар үшін жаңа мүмкіндіктер ашатын зерттеу университеті мәртебесі берілді. Отырыстың маңызды сәтінің бірі — профессор-оқытушылар құрамын марапаттау. Білім және ғылыми қызметтегі жетістіктері үшін ректор білім және ғылым министрінің Құрмет грамоталарын, алғыс хаттарды, сондай-ақ ректордың Құрмет грамоталары мен алғыс хаттарын табыс етті. 2024-2025 жылдарға арналған даму бағдарламасына сәйкес университетте материалдық-техникалық базаны жақсартуға бағытталған маңызды жобалар жоспарланған, олардың ішінде: химия факультеті үшін оқу-зертханалық корпус салу; 500 орындық жатақхана салу; спорт алаңдары мен әкімшілік-тұрмыстық кешені бар ашық стадион салу; термос жылыжайын салу және пайдалану; баламалы энергия үшін полигон салу; ғылыми және оқу зертханалары үшін заманауи жабдықтар сатып алу; технопарк құрылысын жалғастыру. Ғылыми зерттеулерді қаржыландыру көлемі 110 жобаны қамти отырып, 2, 6 млрд теңгені құрайды. Бұл бастамалар ғылыми әлеуетті дамытуға және студенттердің оқу сапасын арттыруға ықпал ететін қолайлы және тиімді білім беру ортасын құруға бағытталған.
