«Фотожурналистика жанры арқылы Евней Арыстанұлы Бөкетовтың жеке брендін дамыту» атты гранттық жоба «Ғылымдағы жаңа есім» атты университетішілік байқауда жеңіске жетіп, 1 млн теңге көлеміндегі сертификатқа ие болды. Жоба биылғы жылы ерекше маңызға ие, себебі көрнекті ғалым, ағартушының 100 жылдық мерейтойы аталып өтуде. Оның еңбектері Қазақстандағы ғылымның беделін арттырып, отандық химия мен өнеркәсіптің дамуына айтарлықтай үлес қосты.Жобаның авторы – Абикеева Назерке Мадиярқызы, филология факультетінің оқытушысы, журналистика кафедрасының магистрі.Жобаның ғылыми жетекшісі – Амангелдиева Гүлмира Сабырқызы, PhD, Е.А. Бөкетов атындағы Академиялық университеттің журналистика кафедрасының доценті.«Жоба аясында бір жыл бойы үлкен жұмыстар атқарылмақ. Атап айтқанда, Е.А.Бөкетов мұражайында фотоальбомның тұсаукесерін өткізу, оны университет кітапханасының 8 оқу залына тарату, жалпы білім беретін мектептердің 9-11-сынып оқушыларымен кездесулер ұйымдастыру, альбомды Н.В.Гоголь атындағы ғылыми әмбебап кітапханада және Абай атындағы облыстық балалар кітапханасында таныстыру, Е.А. Бөкетовтің барлық мұрағаттық фотосуретін қамтитын веб-сайт ашу, сондай-ақ Facebook, Instagram, TikTok әлеуметтік желілерінде ақпараттық-насихаттық жұмыстар жүргізу жоспарланған», – дейді Назерке Мадиярқызы.Зерттеу тобының мүшелері мұрағаттар мен мұражайлармен бірлесіп жұмыс жүргізуді, табылған фотоматериалдарды іріктеуді, сондай-ақ жасанды интеллект көмегімен оларды қалпына келтіріп, қазіргі заманғы форматтарға бейімдеуді жоспарлап отыр.