Қола дәуіріне жататын Нұраталды-1 қорымының қоршауын қазу кезінде бұйымдар көмбесі табылды. Көмбеде қанжарлар (3 дана), найзаның ұштары (2 дана), біз, құймакесек (2 дана), белгісіз заттың сынығы бар. Барлық заттар қоршау тақтасының сыртқы жағына көлбеу (бойлық ось бойымен) орналасып, сүйір бұрышпен жерге қадалған. Үшкір ұшы жоғары қарай қаратылған біз найзаның ұзын ұшының төлкесіне салынған.Морфологиялық-типологиялық сипаттамаларына қарай көмбе бұйымдарын Нұра-Федоров мәдениетіне (б. э. д. XVII-XVIғғ.) жатқызуға болады.Аналитикалық зерттеулерден Нұра-Фёдоров мәдениеті шеберлерінің сол кездің өзінде-ақ екі жапырақты қалыптарға орташа және жоғары қоспалы қалайы қоладан қару мен құрал-жабдықтарды құю сияқты металл өңдеудің прогрессивті технологиясын игергенін көруге болады.Бұл қола бұйымдар кешені сирек кездесетін ғұрыптық (ғибадаттық) көмбелер санатына жатады, оларды өндірістік қызметте сәттілік әкеліп, жәрдемдесетін құдайларға деген сыйлық ретінде қарастыруға болады.
