Қарағандыда студенттік жастар арасындағы ХІХ облыстық спартакиада өз мәресіне жетті. Бұл дода өңірдің спорттық өміріндегі жарқын оқиғалардың бірі болды. Академик Е.А.Бөкетов атындағы Қарағанды университетінің студенттері жоғары нәтиже көрсетіп, жалпыкомандалық есепте бірінші орынды иеленді.Спартакиада бағдарламасына 14 спорт түрі енгізілген, олардың қатарында тоғызқұмалақ, асық ату және қазақ күресі сияқты ұлттық ойындар да бар.Тоғызқұмалақ турнирінде жеңіске жеткен – «Ақпараттық жүйелер» білім беру бағдарламасының 2 курс студенті Серіков Аслан. Ол өз жетістігімен және болашаққа деген биік мақсаттарымен бөлісті.Асланның ұлттық ойынмен танысуы ерте балалық шағында басталған. Ағайын-туыстарының шебер ойнағанын көріп, ол бірден тоғызқұмалақтың ерекше тартымдылығын сезінді. Бұл ойынның жылдам шешім қабылдау қабілеті мен позицияны сезіну шеберлігін талап ететіні оны ерекше қызықтырды.«Мен тоғызқұмалақпен 17 жылдан астам уақыт бойы айналысып келемін. Шеберлігім бірден емес, біртіндеп, турнирлерге қатысу арқылы қалыптасты. Мен үшін ең бастысы – тәжірибе жинақтау, қарсыластармен ойнап, дебюттерді есте сақтау және түрлі тактикалық тұзақтарды дайындау», – дейді Аслан.Спартакиадаларға қатысу жас спортшы үшін әрдайым ерекше маңызға ие. Өйткені әрбір жеңіс – тек жеке жетістік қана емес, командалық табыстың, табандылық пен мақсаткерліктің дәлелі.«Ал жеңілістер – бұл сабақ, қандай жағдайда да, мен үшін тәжірибе. Олар мені мықтырақ етеді және кәсіби спортшы ретінде өсуіме көмектеседі», – деп атап өтті ол.Болашақта жас ойыншы тоғызқұмалақтан халықаралық дәрежедегі спорт шебері атағын алуды армандайды. Бұл оның басты мақсаты, кез келген қиындықтарға қарамастан, алға жетелейтін жарық жұлдызы. Ол өз күшіне сенеді және арманының орындалуы үшін барын салуға дайын.