7 наурыз күні Бөкетов Қарағанды университетінің Студенттер сарайында 8 наурыз — Халықаралық әйелдер күніне арналған мерекелік концерт өтті.Салтанатты шараның шымылдығын ашқан университет ректоры Н. О. Дулатбеков сөз сөйледі. Оның айтуынша, білім ордасының үлкен әрі тату ұжымында ару ұстаздар мен қызметкерлер көптеп еңбек етеді.«Біз әрдайым сіздердің жетістіктеріңізбен мақтанамыз. Жұмысқа келген сайын сіздерге жылы лебіздер білдіргіміз келеді. Қымбатты ханымдар, сіздерге шын жүректен табыс, бақыт және махаббат тілейміз», — деп ректор залдағы әйелдер қауымына ізгі тілегін жеткізді.Одан кейін университеттің профессорлық-оқытушылық құрамы мен қызметкерлері ректор атынан Құрмет грамоталары және Алғысхаттармен марапатталды. Бұл сәтте оған университеттің ресми бойтұмары — арыстан кейпіндегі кейіпкер көмек көрсетті.Концерттік бағдарламаның екінші бөлімін стратегиялық мәселелер жөніндегі проректор Е. Ж. Сармурзин, әлеуметтік-мәдени даму жөніндегі проректордың міндетін атқарушы Нұржан Арғынұлы Жетпісбаев және Студенттер сарайы «Шаттық» театрының жетекшісі Ахай Сәдуақасұлы Жұмамұратов жүргізді.Көңілді кештің концерттік бағдарламасы ән мен биден тұрды. Сонымен қатар профессорлық-оқытушылық құрам және университет қызметкерлерінің балалары мен немерелерінің құттықтауы ерекше әсер қалдырды.Алайда кештің ең есте қаларлық нөмірі — халық ансамблі «Жарқынның» алғашқы құрамының өнер көрсетуі. Университеттің оқытушылары мен профессорлары сахна төрінде жеңіл әрі көркем би билеп, көрермендерді тәнті етті.Концерттік бағдарлама аясындағы барлық музыкалық нөмір әсерлі әрі қызықты өтті. Оларды залдағы көрермендер ұзақ әрі ыстық ықыласпен қол соғып қарсы алды.