«FDM және DLP-SLA әдістерімен оптикалық элементтерді жасаудың технологиясын әзірлеу» атты креативті әрі өзекті жоба «Ғылымдағы жаңа есім» атты университетішілік байқауда жеңіске жетті. Жобаның жетекшісі – радиофизика және электроника кафедрасының аға оқытушысы Болатбекова Мадина Мұратқызы. Оның басшылығымен зерттеу тобы 1 миллион теңге көлеміндегі грантқа ие болды.Мадина Мұратқызының айтуынша, жобаның мақсаты – FDM және DLP-SLA әдістерімен басып шығарылған оптикалық компоненттердің (линзалардың) сапасын салыстырмалы түрде талдап, 3D басып шығарудың ең тиімді тәсілін анықтау.«Алынған нәтижелер баспа үшін оңтайлы жағдайларды анықтауға мүмкіндік береді және 3D басып шығару технологияларын одан әрі жетілдіруге ұсыныстар жасауға негіз болады. Бұл медицина, оптоэлектроника, автомобиль өнеркәсібі және басқа да жоғары технологиялық салаларда қолданылуы мүмкін», – деп қорытындылады ол.